A ciberseguridade centra a nova pílula formativa de Laboralia

A ciberseguridade centra a primeira das pílulas formativas impulsadas polo Consello Social da Universidade da Coruña no marco de Laboralia, o seu programa de formación en competencias profesionais dirixido a estudantado, mocidade titulada e profesionais en activo que persegue mellorar a súa inserción laboral.

‘Ciberseguridade para todos: Competencias básicas para o teu perfil profesional’ é o título da xornada que se impartirá o martes 26 de abril, entre as 17.30 e as 19.30 horas en formato en liña. A inscrición para asistir está aberta ata o luns 25 de abril ás 11 da mañá nesta ligazón: https:// laboraliaudc. com/

Formación en ciberseguridade a cargo de expertos

A pílula formativa correrá a cargo dos expertos en ciberseguridade e seguridade informática, Pablo González Pérez e Álvaro Núñez-Romero, que dividirán o seminario en tres bloques diferenciados e interconectados: Riscos na internet; Protección básica (na túa contorna doméstica e profesional); e protección de smartphones e ameazas de futuro.

Ambos os profesionais insisten en que a seguridade da información nos afecta como cidadáns de forma directa. A regulación, protección e garantía do uso adecuado dos datos e as redes polas que transitan é un aspecto clave da seguridade cidadá, con impacto directo sobre a privacidade. Operar e interactuar no mundo dixital conleva hoxe riscos para a nosa seguridade que nos afectan no plano persoal e profesional con independencia do noso perfil ou do sector en que desenvolvamos a nosa actividade.

Cada vez dependemos máis da tecnoloxía e a nosa vulnerabilidade ante riscos derivados de ciberataques é cada vez maior. Por tanto, informarse e formarse para saber protexerse e previr estes aspectos é fundamental.

As persoas asistentes poderán realizar preguntas aos relatores a través do chat transmitindo as súas preguntas por escrito que serán lidas na quenda de preguntas.

Máis información sobre a temática e inscrición en https://laboraliaudc.com