O delegado do Goberno en Galicia recibe ao presidente do Consello Social

O delegado do Goberno en Galicia, Santiago Villanueva Álvarez, recibiu esta mañá ao presidente do Consello Social da Universidade da Coruña (UDC), Antonio Abril Abadín. A reunión, que se celebrou na Coruña, na sede da Delegación do Goberno, encádrase dentro da política de colaboración do Consello Social coas institucións públicas e privadas do seu ámbito de actuación.

Cinco meses despois da designación de Santiago Villanueva Álvarez como delegado do Goberno en Galicia, Antonio Abril Abadín presentou as áreas de traballo do Consello Social e trazou liñas futuras de colaboración entre as dúas institucións.

Antonio Abril Abadín fixo un repaso das actuacións do Consello Social da UDC en materia de Responsabilidade Social, o seu papel no fomento das relacións Universidade-Sociedade e a importancia do desenvolvemento de actuacións nas áreas de innovación, emprendemento e transferencia de coñecemento.