Funcións e compromisos
Principais funcións do Consello Social da Universidade da Coruña
A Lei Orgánica 6/2001, de 21 de decembro, de Universidades, e a Lei 6/2013, de 13 de xuño, do Sistema Universitario de Galicia, atribúen aos consellos sociais das universidades públicas un abanico amplo de funcións relacionadas coa supervisión e control das actividades universitarias e o impulso das relacións Universidade-Sociedade. De entre elas, pola súa importancia para a sociedade e para a universidade, poden destacarse as seguintes:
- Supervisar as actividades de carácter económico da Universidade da Coruña. Correspóndelle ao Consello Social aprobar, en particular, a proposta do consello de goberno, o orzamento e as contas anuais da UDC, así como aprobar e realizar o seguimento da programación plurianual da universidade.
- Informar sobre o cadro de persoal e a relación de postos de traballo do persoal docente, investigador e de administración e servizos da Universidade da Coruña, así como informar sobre os convenios colectivos do persoal contratado.
- Aprobar a creación, modificación substancial ou extinción das sociedades, fundacións ou outras entidades en cuxo capital ou fondo patrimonial teña participación a Universidade da Coruña, calquera que sexa a forma xurídica que adopten, así como a súa integración nas mesmas.
- Acordar, co Reitor, nos termos previstos na lexislación orgánica de universidades, o nomeamento e cesamento da persoa titular da Xerencia da UDC.
- Supervisar o rendemento e calidade dos servizos universitarios, formulando, no seu caso, suxestións e propostas ao Consello de Goberno da Universidade, orientadas a promover a excelencia na ensinanza, investigación, xestión e servizos.
- Fixar os prezos das ensinanzas propias, dos cursos de especialización e os referentes ás demais actividades autorizadas polas universidades, así como informar en materia de prezos públicos dos estudios universitarios oficiais, dentro dos límites que estableza a Conferencia Xeral de Política Universitaria.
- Informar sobre os acordos do Consello de Goberno relativos á implantación e supresión das ensinanzas conducentes á obtención de títulos universitarios de carácter oficial e validez en todo o territorio nacional, así como a creación, modificación e supresión de centros, institutos universitarios de investigación ou calquera outra figura que adopten.
- Impulsar aquelas actuacións que permitan un maior achegamento do estudantado universitario ás demandas do mercado laboral e, en especial, a sinatura de convenios entre a Universidade da Coruña e outras entidades, públicas e privadas, orientadas a completar a formación do alumnado e das persoas tituladas da universidade e a facilitar a súa vinculación co mundo empresarial.
- Estimular a actividade investigadora da Universidade da Coruña, especialmente no relativo á súa vinculación cos sectores produtivos, apoiando os proxectos de I+D+i compartidos entre universidade, empresas e tecido social, así como as políticas de transferencia e difusión dos resultados obtidos nas investigacións universitarias.
- Organizar calquera clase de actividades e eventos que favorezan o coñecemento mutuo e a colaboración da sociedade no financiamento do ensino e da investigación da UDC.
- Realizar estudos para adecuar a oferta de titulacións e do contido dos plans de estudos da UDC ás necesidades sociais e para facilitar a inserción laboral dos titulados universitarios e a transferencia á sociedade dos resultados da investigación desenvolvida na UDC.
compromisos
- Apoiar a implantación na UDC do Espazo Europeo de Educación Superior, procurando a adaptación da oferta académica ás necesidades da sociedade.
- Impulsar na UDC as boas prácticas da cultura organizativa, o bo goberno e a xestión transparente e eficiente en resposta ás necesidades e demandas sociais.
- Promover na UDC a cultura emprendedora como competencia profesional xenérica ou transversal clave para o cumprimento da misión da UDC na promoción do desenvolvemento económico e social.
- Aprobar e manter actualizado un plan estratéxico de actuacións, ademais do compromiso de servizos, e publicar a memoria anual das súas actividades.
- Manter actualizada a páxina web onde se publique toda a información relevante do Consello Social e das súas actividades.
- Impulsar a organización de toda clase de eventos, incluídos premios, distincións e recoñecementos, que favorezan o coñecemento mutuo e a interrelación entre a UDC e a sociedade.
- Promover o achegamento entre a UDC e as empresas, singularmente a través do fomento das prácticas dos universitarios nas empresas e da creación de cátedras Universidade-Empresa.
- Fomentar a proxección internacional da UDC a través de redes de colaboración no marco do Espazo Europeo de Educación Superior.
- Promover o compromiso da UDC no ámbito da súa Responsabilidade Social Universitaria.
- Crear e manter vixente unha rede que permita o contacto permanente da UDC cos seus exalumnos e outras persoas e empresas relacionadas.
- Atender as suxestións e reclamacións no prazo máis breve posible.