Grande acollida da xornada sobre discapacidade e inclusión
O Consello Social da Universidade da Coruña (UDC) pechou a xornada do 21 de abril con grande éxito de afluencia o programa “Retos e Tendencias no eido Universidade-Empresa sobre Discapacidade e Inclusión”. A xornada, que tivo lugar na sede de Afundación na Coruña, cumpría o obxectivo de poñer de manifesto a integración como unha peza clave para o desenvolvemento laboral das persoas con discapacidade.
O presidente do Consello Social da UDC, Antonio Abril Abadín, abriu o programa co convencemento de que “o que pode transformar o mundo é a educación”, ademais de facer unha aposta decidida pola inclusión: “Todos temos algunha discapacidade. Pensar que é un tema que afecta só ás familias e non a todos, xa é unha discapacidade”.
O programa de conferencias tamén contou coa intervención do reitor da Universidade da Coruña, Julio Abalde, que destacou a importancia de fomentar unha “interacción Universidade-Empresa” para a inclusión laboral das persoas con discapacidade: “Dende a UDC estamos orgullosos de iniciativas como Espazo Compartido e de ter unha Vicerreitoría específica para estes temas. Son actividades que precisan financiamento engadido e na UDC estamos traballando para acadar cada vez máis recursos”.
Un dos puntos fortes da xornada foi o relatorio “O talento desde persoas con miradas diferentes”, de Mara Dierssen, prestixiosa científica no eido da neurociencia e investigadora do Centro de Regulación Xenómica. “Aínda non se acadou un acceso significativo ao emprego público por parte das persoas con discapacidade. A realidade non é a legalidade”, lembrou Dierssen. A científica pensa que a sociedade aínda “non está convencida de por que temos que integrar a estas persoas”, a pesar do valor da diversidade: “É necesario incorporar perspectivas diferentes e grupos heteroxéneos, porque a diversidade de miradas é o que produce a excelencia”.
O acto tamén contou con dúas mesas de debate nas que participaron Antonio-Luis Martínez-Pujalte, director da Cátedra de Discapacidade e Empregabilidade Tempe-APSA; Araceli Torres Miño, vicerreitora do campus de Ferrol e de Responsabilidade Social da UDC; Francesc Sistach Vallvé, director xeral de Specialisterne; Enrique Silvestre, xerente do Instituto Nacional da Administración Pública; Francisco Botia, director xeral de Ilunion Capital Humano; e Ramón Capdevila Pagès, director xeral de Fundación Universia. Nas súas intervencións púxose de manifesto a importancia de experiencias de integración de persoas con discapacidade no contorno laboral, como Espazo Compartido, Tempe-APSA ou Specialisterne.
Os relatores lembraron que en España hai preto de 21.000 estudantes universitarios con discapacidade, pero a integración laboral aínda é un reto pendente, posto que só accede ao mercado de traballo un de cada catro. A crise tamén afectou especialmente a este colectivo, xa que nos últimos anos se incrementou un 217 por cento a porcentaxe de persoas con discapacidade en situación de desemprego.