Manuel Pizarro, novo presidente da Conferencia de Consellos Sociais
Manuel Pizarro foi proclamado novo presidente da Conferencia de Consellos Sociais de Universidades Españolas (CCS) nunha Asemblea Xeral Extraordinaria celebrada en Madrid. Pizarro, á fronte do Consello Social da Universidade Autónoma de Madrid, substitúe a Joaquín Moya-Angeler, que deixa de xeito voluntario o cargo que ocupou dende 2014 despois de cumprir 20 anos como presidente do Consello Social da Universidade de Almería. Tamén entra a formar parte do Comité Executivo da CCS Ladislao Azcona, presidente do Consello Social da Universidade de Oviedo.
Pizarro asegurou que vai continuar as liñas mestras do seu antecesor, impulsando a reforma do goberno corporativo da Universidade. “O coñecemento non é monopolio de ninguén”, afirmou. “Temos que ser axitadores da sociedade fronte á Universidade e da Universidade fronte á sociedade, con modestia, pero con firmeza”.
Na mesma Asemblea, Joaquín Moya-Angeler resultou elixido por aclamación presidente honorario da CCS. Durante o seu mandato, logrou consolidala no ámbito interno e potenciar a súa presenza externa, a través tanto dunha maior visibilidade pública dos Consellos como do incremento da súa presenza institucional.
Desta maneira, o Comité Executivo da CSS queda integrado por: Manuel Pizarro (Universidade Autónoma de Madrid, presidente); Julio Revilla (Universidade de Huelva, vicepresidente); Ricardo Martí Fluxá (Universidade Rey Juan Carlos, vicepresidente); Antonio Abril Abadín (Universidade da Coruña, vogal); Ladislao Azcona (Universidade de Oviedo, vogal); Francisco Borja (Universidade Miguel Hernández, vogal); Anabel Carrillo (Universidade de Córdoba, vogal); Lothar Siemens (Universidade das Palmas de Gran Canaria, vogal) e Manuel A. Villa (Universidade Antonio de Nebrija, vogal).
Manuel Pizarro (Teruel, 1951) é Avogado do Estado e Académico de Número da Real Academia de Xurisprudencia e Lexislación e da Real Academia de Ciencias Económicas e Financeiras. Adxunto á presidencia de El Corte Inglés, foi presidente de Endesa, da Bolsa de Madrid e de Ibercaja.