Paolo Gaudiano impartirá a primeira sesión do ciclo de conferencias En Código Aberto 2025/26

A Cátedra Inditex-UDC de Sostibilidade inaugura a nova edición do seu ciclo En Código Aberto coa conferencia “Como desmontar a nata montada: xestionando a complexidade na empresa e na sociedade”, a cargo de Paolo Gaudiano, fundador e científico xefe de Aleria, empresa tecnolóxica especializada en diversidade e inclusión.

A charla terá lugar o vindeiro 4 de marzo ás 19:30 h no Paraninfo do Reitorado da UDC. Pode consultar a localización aquí. Ao remate da conferencia, para facilitar o contacto entre as persoas asistentes, terá lugar un breve encontro de networking no vestíbulo do Paraninfo.

Xestión da complexidade, inclusión e meritocracia

Que teñen en común as neuronas da nosa retina, unha bandada de aves, un equipo de fútbol e unha empresa? Todos son exemplos de sistemas complexos: un conxunto de moitos elementos no que o comportamento global do sistema emerxe —ás veces de forma imprevisible— a partir dos comportamentos e das interaccións dos elementos individuais.

Tras introducir os conceptos clave, a ponencia presenta un enfoque que combina as ciencias do comportamento e as simulacións por ordenador, e ilustra a súa aplicación a unha serie de problemas do mundo real. A continuación, a charla mostra como, utilizando este mesmo enfoque, as empresas poden integrar os conceptos de inclusión e meritocracia para acadar maiores beneficios e incrementar a satisfacción do seu equipo humano.

Sobre Paolo Gaudiano

Paolo Gaudiano é o fundador e científico xefe de Aleria, empresa tecnolóxica especializada en diversidade e inclusión. Conta con formación en enxeñaría aeroespacial e neurociencia. Foi profesor titular na Universidade de Boston e impartiu docencia na Universidade de Tufts, na Universidade Municipal de Nova York e na Universidade de Nova York, ademais de presidir a Conferencia Anual de Investigación sobre Diversidade e Inclusión – Annual Diversity & Inclusion Research Conference (DIRC).

É autor do libro Measuring Inclusion, impartiu dúas charlas TEDx e colabora de forma habitual con publicacións de referencia. O seu traballo foi recoñecido con diversos premios e bolsas nos ámbitos do emprendemento social, a robótica e a neurociencia.

Acceso á conferencia

Aínda que a conferencia é de acceso libre, débese formalizar a inscrición nesta ligazón, na que tamén se pode solicitar un certificado de asistencia. No caso de non poder asistir á charla presencialmente, nesta mesma ligazón hai acceso á retransmisión en directo vía streaming.

En Código Aberto, unha iniciativa da Cátedra Inditex-UDC de Sostibilidade

O Ciclo de Conferencias En Código Aberto está promovido pola Cátedra Inditex-UDC de Sostibilidade. A relación da Universidade da Coruña con Inditex propiciou hai máis dunha década a creación da cátedra, froito do acordo de colaboración asinado por ambas as entidades para o fomento da responsabilidade social universitaria en 2010. A coordinación desta iniciativa está a cargo do Consello Social da UDC, na súa calidade de órgano de participación da sociedade na universidade.